(കവിത)

ആര്‍ഷ കബനി

രാത്രിയിലേക്കുള്ള കൂർക്കൽ ഒരുക്കുമ്പോഴാണ്-
അങ്ങേര് കുളികഴിഞ്ഞെത്തിയത്.
എല്ലായിപ്പോഴത്തെപ്പോലെ അപ്പോഴും-
ആ ഉടൽനനവോടെ കെട്ടിപ്പിടിക്കാൻ കൊതിപെരുത്തു.
അകത്ത് അങ്ങേരുടെ തള്ള-
കൊന്തചൊല്ലുന്നതിന്റെ ഒച്ച.
കൂർക്കലുകൾ തൊലിയുരിഞ്ഞുരിഞ്ഞ്,
ചട്ടിയിലേക്കിട്ടു.
അവയുടെ രക്തക്കറ പത്ത് വിരലുകളിലും പടർന്നു.
പ്രേമത്തിന്റെ മണമുള്ള കൂർക്കലുകൾ.

*

ഈയലുകൾ പറക്കുന്ന വെളിച്ചത്തിൽ-
അത്താഴം വിളമ്പി.
തഴമ്പിച്ച കൈയ്യാൽ അങ്ങേര് ചോറും കൂട്ടാനും കുഴക്കുന്നു.
ആ വിയർക്കുന്ന ഉടലിനോട് ഒട്ടിയിരിക്കാൻ ഉള്ളിൽ പ്രേമംമൂത്തു.
എന്നാൽ ആ നിമിഷം,
മെഴുക് മണത്തോടെ അങ്ങേരുടെ-
തള്ള വന്നു.
ചോറിൽനിന്നുയരുന്ന ആവി,
എന്റെ മുലകളേയും ചുണ്ടുകളേയും തൊട്ടു.
ഈയലുകൾ മുടിക്കെട്ടിലൂടെ പറക്കുന്നു.
അവയുടെ ചിറകുകളിലാണിപ്പോൾ പ്രേമത്തിന്റെ പാട്ട്.

*

ഇത് മിന്നാമിനുങ്ങുകളുടെ രാത്രി.
മുറിയിലാകെ അവയുടെ വെട്ടം.
ഉഷ്ണിച്ച അന്തരീക്ഷത്തിൽ-
തള്ളയുടെ കൂർക്കംവലി.
കെട്ടിപ്പിടിച്ച കൈ തട്ടിമാറ്റി-
അങ്ങേര് തിരിഞ്ഞുകിടന്നുറങ്ങുന്നു.
ഉടലിൽ നിറയെ വിങ്ങിനിക്കുന്ന-
പ്രേമത്തിന്റെ മുള്ളുരഞ്ഞ് എനിക്ക് നൊന്തു.

*

കഞ്ഞിപ്പശ മുക്കിയ മഞ്ഞ ശലഭങ്ങളുടെ-
സാരി പിന്നാമ്പുറത്ത്,
ബക്കറ്റിലിരിക്കുന്നു.
ഞാനുച്ചത്തേക്കുള്ള മീൻവെട്ടുകയായിരുന്നു.
കൊന്തമണികൾ കൈയ്യിൽ കോർത്ത്-
അങ്ങേരുടെ തള്ള വന്നു.
അവരെന്റെ മുടികൾ കോതി ,
തലയിൽ പനിനീർ പൂ തിരുകി.
അവരുടെ കൈകൾക്ക് പ്രാർത്ഥനാ പുസ്തകത്തിന്റെ പരുപരുപ്പ്.
നെഞ്ചിൽ നിന്നൊരു കരച്ചിൽ വന്നെന്റെ തൊണ്ടയിൽ തിക്കിതിരക്കി.

*

പ്രാർത്ഥനാ പുസ്തകത്തിനോട്
കൊന്തമണികളോട്
കത്തുന്ന മെഴുകുതിരി മണത്തോട്
തോന്നുന്ന തരത്തിലുള്ള സ്നേഹം
എനിക്കവരോട് തോന്നി.

ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല