(കവിത)

ബിജു ലക്ഷ്മണൻ

ഇത്രയോ ദൂരമെന്ന്
രണ്ടറ്റങ്ങളിൽ നിന്നും
നെടു വീർപ്പിടുന്നു.

ഇത്രയേ കാഴ്ച്ചയെന്ന്
വെളിച്ചം കാടായ്
നിഴലുകളിൽ
ഒളിപ്പിക്കുന്നു.

ഇത്രയേ ആഴമെന്ന്
പുഴ …
ഇത്രത്തോളം കുറിയതെന്ന്
ആറും.

പച്ചയാറി
വിളർത്ത കാട്ടിൽ
നീറിയൊരാറായവൾ
ഒഴുകി.

അപ്പനൊര് പന്തി
ചേട്ടനൊര് പന്തി
അവസാന പന്തിയിൽ
ഒരു വറ്റു മാത്രമായ നേരങ്ങൾ
ഒറ്റ വാക്കായവൾ
പുലർത്തി.

കാടോളം
കാട്ടുതീയിലെരിഞ്ഞ്
പോറലേൽക്കാത്തിടങ്ങളിലൊരിടം
തേടിയൊരടുപ്പു കൂട്ടി.

അരി
കപ്പ
വേവ് വേറെ വേറെയൂറ്റണം
ഇനിയും പന്തി ബാക്കിയുണ്ട്.

ഓളൊരൊച്ച വച്ചു
പ്ഫ….!
ആറൊരു പുഴയായി
പുഴയൊര് കടലായ്
കടലൊരുപിടിയുപ്പായ് .

മാനം കറുത്തിടിവെട്ടി .
പ്ഫ…

ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല