കവിത
ഷംസ്
 
പാതിരാവിലൊരു പ്രേതമെന്റെ
പാതിരാവണ്ടിക്കു കൈകാട്ടി
 
മഞ്ഞും മാറാലയും കൊണ്ടു
മുറുക്കിവെച്ച ജനാല
ഒറ്റച്ചിമ്മലിൽ സുതാര്യമായി.*
 
ഊരിവീഴുന്നു
ഓർമ്മപ്പത്തായത്തിൻ
ഓടാമ്പലുകൾ,
ചിറകടിച്ചുയരുന്നു
മറവിക്കുഞ്ഞുങ്ങൾ.
 
ഒരേ മരം മണം
അതേ നഗരം തീരം
 
കാന്തമേറ്റതു പോലെൻ
അകക്കാന്തികൾ,
സ്വയം കുരുങ്ങിപ്പോയ
ചിലന്തികൾ.
 
സമയത്തോടുള്ള
വഞ്ചനയത്രേ
ഓർമകളുടെ
ജനിതകം.
 
അതിനാൽ
പാതിരാത്രിയിലെ
പ്രേമമേ,
ഈ പാതിരാവണ്ടി
നീയേ തെളിക്കുക
തിരിച്ചെന്നെ നടത്തുക.
 
കാലമേ ഇനി ബാക്കിയായിട്ടുള്ളൂ.
 

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.