കവിത
ജാബിർ നൗഷാദ്
ദൂരെ,
നക്ഷത്രങ്ങൾക്കും ഗ്രഹങ്ങൾക്കുമക്കരെ
ശൂന്യതയിൽ
ഒരു കടത്തു വഞ്ചി നീങ്ങുന്നു
അതിൽ ദൈവത്തിനുള്ള
അപ്പ കഷ്ണം
ഉറുമ്പരിച്ചു തുടങ്ങുന്നു.
മധുരത്തിന്റെ ലഹരിയിൽ
അവരോരോരുത്തരും
ഭൂമിയിലേക്ക് ബോധരഹിതരായ് വീഴുന്നു,
നോക്കെത്താ ദൂരത്തോളം
കറുത്ത ജഡങ്ങൾ.
ബാക്കിയായൊരുറുമ്പ് കവിയുടെ
വിരലിൽ നമസ്കരിക്കുന്നു
ലോകം തീർന്നിരിക്കുന്നു
പാപങ്ങളൊടുങ്ങിയിരിക്കുന്നു
ആദം തെറ്റേറ്റ് പറഞ്ഞു
ദൈവത്തിന് മുന്നിൽ മുട്ടുകുത്തിയിരിക്കുന്നു
സ്നേഹം ഒരു ചിലന്തിവല പോലെ
മനുഷ്യരെ കുരുക്കിയിരയാക്കിയിടുന്നു.
ലോകാവസാനം,
ഇതുവരെ ചൊല്ലിയ നുണകൾ
നീറിയ മുറിവുകൾ
നീലിച്ച കണ്ണുകൾ
രചിച്ച ബിംബങ്ങൾ
രുചിച്ച മധുരം
കുടിച്ച വിഷം
എല്ലാം ഒരൊറ്റ വഞ്ചിയിൽ എത്തിച്ചേരുന്നു.
ഞാൻ പറഞ്ഞുവല്ലോ
ദൈവത്തിനുള്ള അപ്പ കഷ്ണത്തിൽ
നിന്നും മധുരം ഒലിച്ചു പോയിരിക്കുന്നു.
ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക
ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in
ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.