നിരവധി റേഡിയോ നാടകങ്ങളിലൂടെ മലയാളികൾക്ക് സുപരിചിതയായ ടി.പി രാധാമണി അന്തരിച്ചു(84). പൂജപ്പുര ചെങ്കള്ളൂര്‍ കൈലാസ് നഗര്‍ കാര്‍ത്തികയില്‍ വ്യാഴാഴ്ച രാത്രി ഏഴരയോടെയായിരുന്നു അന്ത്യം. തിരുവനന്തപുരം മണക്കാട് സ്വദേശിയായ രാധാമണി പാട്ടുകാരിയായും അഭിനേത്രിയായും ആകാശവാണിയിൽ നിരവധി പരിപാടികൾ അവതരിപ്പിച്ചിട്ടുണ്ട്.
അച്ഛന്റെ സംഗീതത്തോടുള്ള അടങ്ങാത്ത അഭിനിവേശം മൂലം സംഗീതം പഠിച്ച രാധാമണി, 1950ൽ സ്വാതി തിരുനാൾ സംഗീത അക്കാദമിയിൽ നിന്നും ഗാനഭൂഷണം പാസായി. ആ സമയത്ത് തന്നെ തിരുവനന്തപുരം റേഡിയോ നിലയത്തിൽ ചെറിയ തോതിൽ കച്ചേരികൾ നടത്തുകയും, വഞ്ചിപ്പാട്ട്, കഥകളി പദങ്ങൾ എന്നിവ അവതരിപ്പിക്കുകയും ചെയ്തിരുന്നു. തിരുനയിനാര്‍ കുറിച്ചി മാധവന്‍നായരുടെ സത്യൻ നായകനായ കരിനിഴൽ എന്ന റേഡിയോ നാടകത്തിൽ നായികയായ രാധാമണിയെ പ്രേക്ഷകർ അംഗീകരിച്ചതോടെ നാടകങ്ങളിൽ സജീവമായി മാറി. സ്റ്റേജിൽ അഭിനയിച്ച് ഒട്ടും പരിചയമില്ലാതിരുന്ന രാധാമണി, പക്ഷേ റേഡിയോ നാടകങ്ങളിലൂടെ ജനശ്രദ്ധ പിടിച്ചു പറ്റി. സാമൂഹിക നാടകങ്ങൾ, പുരാണ നാടകങ്ങൾ തുടങ്ങി നിരവധി നാടകങ്ങളിൽ കരുത്തുറ്റ സ്ത്രീകഥാപാത്രങ്ങളെ അവർ അവതരിപ്പിച്ചു. ജരാസന്ധന്റെ പുത്രി, എസ് രമേശൻ നായർ എഴുതിയ ചിലപ്പതികാരം, കുന്തി, ഗാന്ധാരി, ഝാൻസി റാണി, ഉമയമ്മ റാണി തുടങ്ങിയവ രാധാമണി അഭിനയിച്ച പ്രശസ്തമായ റേഡിയോ നാടകങ്ങളാണ്.
43 വർഷം ആകാശവാണിയിൽ പ്രവർത്തിച്ച ശേഷം വിരമിച്ച രാധാമണി, അറുപതോളം ചിത്രങ്ങളിൽ നിരവധി കഥാപാത്രങ്ങൾക്ക് ശബ്ദം നൽകിയിട്ടുണ്ട്. ‘ദേവി കന്യാകുമാരിയിൽ’ ദേവിയായി അഭിനയിച്ച വിനോദിനിക്ക് ശബ്ദം നൽകിയത് രാധാമണിയായിരുന്നു. ‘ഏണിപ്പടികള്‍, ലൈലാ മജുനു, ശ്രീ ഗുരുവയൂരപ്പന്‍, പ്രിയമുള്ള സോഫിയ, ശാലിനി എന്റെ കൂട്ടുകാരി, കള്ളന്‍ പവിത്രന്‍, കേള്‍ക്കാത്ത ശബ്ദം, നവംബറിന്റെ നഷ്ടം, പോക്കുവെയില്‍’ തുടങ്ങിയ ഒട്ടേറെ ചിത്രങ്ങള്‍ക്ക് ശബ്ദം നല്കിയിട്ടുണ്ട്. സത്യൻ അന്തിക്കാടിന്റെ നിർബന്ധത്തിനു വഴങ്ങി, രസതന്ത്രം എന്ന ചിത്രത്തിൽ ഒരു ചെറു വേഷത്തിലും അഭിനയിച്ചു. പിന്നീട് ഇന്നത്തെ ചിന്താവിഷയത്തിലും ഒരു ചെറു വേഷം ചെയ്തു. 1975 ൽ കേരള സംഗീത നാടക അക്കാദമി പുരസ്‌കാരം രാധാമണിക്ക് ലഭിച്ചു. ആദ്യമായി ആ പുരസ്‌കാരം ലഭിക്കുന്ന റേഡിയോ ആർട്ടിസ്റ്റും രധാമണിയാണ്. നടനും റേഡിയോ ആർട്ടിസ്റ്റുമായ പരേതനായ ഗംഗാധരൻ നായരാണ് ഭര്‍ത്താവ്. മക്കളായ ജി.ആര്‍ ചന്ദ്രമോഹന്‍, എസ്.ബി.ഐ ജീവനക്കാരനായ ജി.ആര്‍. നന്ദകുമാര്‍ എന്നിവര്‍ ഡബ്ബിങ്ങ് മേഖലയില്‍ പ്രശസ്തരാണ്. ജി.ആര്‍. ശ്രീകല (റിട്ട.ചീഫ് മാനജേര്‍ എസ്.ബി.ടി), ദൂരദര്‍ശന്‍ വാര്‍ത്താ അവതാരകനും, പ്രോഗ്രാം എക്സിക്യൂട്ടിവുമായ ജി.ആര്‍ കണ്ണന്‍ എന്നിവരാണ് മറ്റു മക്കള്‍. ശവസംസ്കാരം വെള്ളിയാഴ്ച ശാന്തികവാടത്തില്‍.