ലോകം

കവിത

അനീഷ് പാറമ്പുഴ

ലോകത്തിന്റെ നാലു കോണുകളിലിരുന്ന്
നാലുപേർ
രാത്രിയിൽ
രാവിലെ
മധ്യാഹ്നത്തിൽ
സായാഹ്നത്തിൽ
സ്വപ്നങ്ങളിൽ
മഞ്ഞും മഴയും
വെയിലും പൊടിക്കാറ്റും
വീഴ്ത്തിക്കൊണ്ടിരിക്കുന്നു

മഞ്ഞിലൊരാൾ
ലോകം മുഴുവൻ കണ്ണെത്താ ദൂരത്തേക്കു നീണ്ടു കിടക്കുന്ന
മഞ്ഞുപോലെ ഏകാന്തമാണെന്നു കരുതുന്നു

കാട്ടിലൊരാൾ
കറുപ്പിൽ
തണുപ്പിൽ
ഇനിപ്പിൽ
കാട്ടാറിന്റെ ഒച്ചയിൽ
മലയണ്ണാൻറെ ചിലമ്പലിൽ
ലോകം ഇപ്പോൾ ഉറക്കമാണെന്നു കരുതുന്നു

കടലിലൊരാൾ
ആദ്യസൃഷ്ടി ജലത്തിൽ എന്നുറപ്പിച്ചു
ചെറിയൊരു വഞ്ചിയിൽ
താൻ മാത്രം
ഉറങ്ങുന്ന ലോകത്തിന് കാവലിരിക്കുകയാണ് എന്ന് കരുതുന്നു

മണലിൽ ഇനിയും ഒരാൾ
മോശയെപ്പോലെ താനീ
മരുഭൂമിയിലൂടെ ജനസഞ്ചയങ്ങളെ
തെളിച്ചു കൊണ്ട് നടക്കുന്നു എന്നു കരുതുന്നുണ്ടാവാം

ലോകത്തിന്റെ പല ഭാഗങ്ങളിൽ അപ്പോൾ
ഉറങ്ങുന്നവർ
ഉണ്ണുന്നവർ
രമിക്കുന്നവർ
കളിക്കുന്നവർ
പ്രസംഗിക്കുന്നവർ
പറക്കുന്നവർ
കൊലപാതകങ്ങൾ,
പീഡനങ്ങൾ
നടത്തുന്നവർ
കടലിൽ മീൻ പിടിക്കുന്നവർ
അങ്ങനെ അങ്ങനെ അങ്ങനെ

മനുഷ്യൻ
ആൾക്കൂട്ടങ്ങളിൽ ഏകാന്തതയും
ഒറ്റപെടലിൽ ലോകത്തെയും തന്നെ
നിർമ്മിച്ചു കളയും.

ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.