തീവണ്ടിയാത്രയിലെ ചില പെണ്ണുങ്ങൾ

കവിത
അബ്ദുള്ള പൊന്നാനി

നാക്ക്
ബാഗിനുള്ളിലൊളിപ്പിച്ച്
വണ്ടികേറുന്നു
ചില പെണ്ണുങ്ങൾ.

തിടുക്കപ്പെട്ട് സീറ്റിലിരുന്ന
നീണ്ട മൗനം
കോട്ടുവായിട്ടു.

പല്ലി ചിലക്കുന്ന ശബ്ദം പോൽ
വിറപൂണ്ട ഫോണെടുത്ത്
വിരല് പതിപ്പിച്ച്
കണ്ണും കാതും ഉള്ളിലൊതുക്കി.
ചിലച്ച് കൊണ്ട്
ഒരു കുഞ്ഞു പാദസരത്തിൻ്റെ ശബ്ദം 
ഓടിക്കളിക്കുന്നുണ്ട് .

കൂർത്ത നോട്ടത്തിൽ
പതുങ്ങിയിരിക്കുന്നുണ്ടൊരു കൊഞ്ചലിൻ നാദം.
ജാലകത്തിന്നപ്പുറത്തെ
പുഴയൊഴുക്കും
തണല് വിരിച്ച മരച്ചില്ലകളും
വെയില് കൊണ്ട് നരച്ച ഉച്ചകളും
അറിഞ്ഞതേയില്ല.

ഒളിച്ച് കളിക്കുമ്പോൾ
പുറകിൽ നിന്നെത്തിനോക്കി ഓടിയൊളിക്കുന്നുണ്ട്
ചില കാഴ്ചകൾ.

തീവണ്ടിയിൽ നിന്നിറങ്ങുവാൻ നേരം
ഒരലയിളക്കം.
വെപ്രാളപ്പെട്ട് 
ബാഗ് തുറന്ന് നാക്കെടുക്കുന്നുണ്ട് .
ശബ്ദങ്ങളുടെ കുത്തൊഴുക്കിൽ
ഒഴുകിപ്പോകുന്നുണ്ട്
പലരും.
…
ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.