ഏ. വി. സന്തോഷ് കുമാർ
മരിച്ചവർ ഒരിക്കൽ തിരിച്ചു വരും
ഒരിക്കൽ മാത്രം.
അന്ന് നിങ്ങൾ
മുമ്പ് പറയാൻ മറന്നവയൊക്കെയും
ഓർത്തെടുത്ത് പറയും.
ചെയ്തുകൊടുക്കുവാൻ കഴിയാതിരുന്നവ
ചെയ്തുകൊടുക്കുവാനായും.
നിങ്ങൾമാത്രം തുടർച്ചയായി
പറഞ്ഞുകൊണ്ടിരിക്കുന്നതിൽ
ജാള്യതപ്പെട്ട്
ചില അഭിപ്രായങ്ങൾ ആരായും.
അപ്പോൾ
നിങ്ങൾ പറഞ്ഞതൊന്നും
വന്നയാൾ
കേട്ടില്ലല്ലോ എന്ന്
കൂടുതൽ ജാള്യതപ്പെടും.
വന്നിരിക്കുന്നതെന്തിനാണെന്ന്
വന്നയാൾ പറഞ്ഞറിയുമ്പോൾ
നിങ്ങൾ
എന്തൊരു ദുരന്തമാണെന്ന തോന്നൽ
നിങ്ങളെ മൂടും.
മരിച്ചുപോയവർ തിരിച്ചുപോകുമ്പോൾ,
അപ്പോൾ മാത്രം
വരച്ചുപൂർത്തിയാക്കിയ ഒരു ചിത്രം
നിങ്ങളുടെ മകൾ
നിങ്ങൾക്ക് കാണിച്ചു തരും.
വന്നുപോയ ആളുടെ മുഖം
നിങ്ങളതിൽ തിരയും.
അപ്പോൾ
സ്നേഹനിർഭരമായ
ഒരാരാശ്ലേഷത്തിൽ
നിങ്ങൾ നനയും.
കൊടുംവേനലിലും
പുറത്ത് മഴ പെയ്യുന്നുവെന്ന്
നിങ്ങൾ അദ്ഭുതപ്പെടും.
ആത്മ ഓൺലൈനിലേക്ക് നിങ്ങൾക്കും കവിതകൾ അയക്കാം:
8086451835 (WhatsApp)
editor@athmaonline.in