കടവ്

കവിത

റോബിൻ എഴുത്തുപുര
ചിത്രീകരണം: സുബേഷ് പത്മനാഭൻ

ഞങ്ങൾക്കൊരു കുളിക്കടവുണ്ട്
ഞങ്ങൾക്കു മാത്രം

ഇരുട്ടും നഗരവും
ശ്മശാനങ്ങളും കടന്ന്
ഒരു കാരണവുമില്ലാതെ
മൂർച്ചയുടെ
ആ ഒറ്റനിമിഷത്തിൽ
വേദനിച്ച് തിരിച്ചുവരുമ്പോൾ
മേലാകെ അഴുക്കു
പുരണ്ടിരിക്കും

ആകാശത്ത്
രണ്ട് ബഹിരാകാശ-
നിലയങ്ങൾ പോലെ
സ്വർഗവും നരകവും
തൊട്ടു തൊട്ടില്ലെന്ന മട്ടിൽ
തെന്നി നീങ്ങുമ്പോൾ

സർപ്പം
ആപ്പിൾ കൊടുക്കുന്നതിന്
തൊട്ടു മുമ്പുള്ള ഏതോ
നിമിഷത്തിന്റെ
ഉലച്ചിലിൽ
ഞങ്ങൾ കടവിലേക്കിറങ്ങും
ഞങ്ങൾക്കു മാത്രമുള്ള കടവിൽ.

…
ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.