ആലപ്പുഴ: പുരോഗമന കലാ -സാഹിത്യ സംഘത്തിന്റെ സ്ഥാപക നേതാവും പത്രപ്രവര്‍ത്തകനും കവിയും നാടകകാരനുമായിരുന്ന എം എന്‍ കുറുപ്പിന്റെ സ്മരണ നിലനിര്‍ത്തുന്നതിനായി പുരോഗമന കലാസാഹിത്യ സംഘം മാരാരിക്കുളം ഏരിയാ കമ്മിറ്റി യുവ എഴുത്തുകാര്‍ക്കായി ഏര്‍പ്പെടുത്തിയിട്ടുള്ള എം എന്‍ കാവ്യപുരസ്‌കാരം അനുശ്രീ ചന്ദ്രന്. എഴുത്തുകാരന്‍ എം എം നാരായണന്‍ ജൂറി ചെയര്‍മാനും എഴുത്തുകാരായ ഡോ. ഒലീന, വിനോദ് വൈശാഖി എന്നിവര്‍ അംഗങ്ങളുമായുള്ള ജൂറിയാണ് അവാര്‍ഡ് നിര്‍ണ്ണയം നടത്തിയത്.
45 വയസ്സ് വരെയുള്ള യുവ എഴുത്തുകാരില്‍ നിന്നാണ് സൃഷ്ടികള്‍ ക്ഷണിച്ചത്. മത്സരത്തിനായി ലഭ്യമായ 112 കവിതകളില്‍ നിന്നുമാണ് അനുശ്രീ ചന്ദ്രന്റെ ‘സൂര്യസൂചിയോട് രാവ് കോക്രി കാട്ടുമ്പോള്‍’ എന്ന കവിത അവാര്‍ഡിനായി തെരഞ്ഞെടുക്കപ്പെട്ടത്. 10,001 രൂപയും ശില്പവും പ്രശസ്തിപത്രവും അടങ്ങുന്നതാണ് പുരസ്‌കാരം. തിരുവനന്തപുരം പരശുവയ്ക്കല്‍ ചന്ദ്ര ഭവനില്‍ ചന്ദ്രന്- ശ്രീകുമാരി ദമ്പതികളുടെ മകളായ അനുശ്രീ ചന്ദ്രന് കാലടി സര്‍വകലാശാലയില്‍ മലയാള വിഭാഗം ഗവേഷക വിദ്യാര്‍ത്ഥിനിയാണ്. അഖില്‍ ആണ് ഭര്‍ത്താവ്. മികച്ച കവിതയ്ക്കുള്ള കടത്തനാട്ട് മാധവിയമ്മ പുരസ്‌കാരവും അനുശ്രീ നേടിയിട്ടുണ്ട്.
ജൂലൈ 9 ഞായറാഴ്ച വൈകിട്ട് 4ന് ആലപ്പുഴ കലവൂരില്‍ നടക്കുന്ന എം എന്‍ കുറുപ്പ് അനുസ്മരണ സമ്മേളനത്തില്‍ നോവലിസ്റ്റ് എസ് ഹരീഷ് അനുസ്മരണ സമ്മേളനം ഉദ്ഘാടനം ചെയ്തു പുരസ്‌കാരം സമ്മാനിക്കും. പുരോഗമന കലാ സാഹിത്യ സംഘം മാരാരിക്കുളം ഏരിയ പ്രസിഡന്റ് സി കെ എസ് പണിക്കര്‍ അധ്യക്ഷനാകും. കലാ സാംസ്‌ക്കാരിക മേഖലകളില്‍ പ്രതിഭ തെളിയിച്ച നാടിന്റെ കലാകാരന്‍മാര്‍ക്ക് വേദിയില്‍ വെച്ച് കേരളത്തിന്റെ വിപ്ലവ ഗായിക പി കെ മേദിനി ആദരവുകള്‍ നല്‍കും.
ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക
ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in
ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല
