ഹബ്റൂഷ്

തീവലയത്തിലൂടെ ചാടാനുള്ളൊരു
ക്യൂവിൽ നിന്നെന്നപോലെ
വെന്തകാലുകളുമായി
തോറ്റമനുഷ്യർ പുറത്തുവരും

‘നിങ്ങളുടേത് ‘ എന്ന് മുദ്രവെച്ച ജീവിതങ്ങൾ
പാരമ്പര്യങ്ങളിൽ നിന്നു കുടിയിറക്കപ്പെടും
കണ്ണുകലങ്ങിയ മനുഷ്യരെ കുത്തിനിറച്ചു
നിലവിളികളോടെ രാജ്യമില്ലാത്തവരുടെ വണ്ടി
ക്രൂരനായ ഗരുഡനെപ്പോലെയവരെ നാടുകടത്തും

ഇരുട്ടൊലിക്കുന്ന കണ്ണുകളാൽ
തൊലിയുരിയുന്ന ഒച്ചയിൽ
ഞാനതിലിരുന്നു കരയും

കൊതിയോടെ ദേശീയഗാനം
ഒരുവട്ടംകൂടി വിറയോടെയിരുന്നു ചൊല്ലും
കുട്ടിക്കാലവും വഴികളും പുഴകളും
ഓണവും പെരുന്നാളും വിദൂരതയിൽ നിന്നു
കൈ വീശിക്കാണിക്കും

ലോകത്തിന്റെ സഹതാപമേ,
തടങ്കൽപാളയത്തിലേക്കു ഉരുകിയൊലിക്കുന്ന
ഞങ്ങളെ നോക്കിയന്ന് അഭയാർത്ഥികൾ
എന്ന് വിളിക്കരുത്

ഞങ്ങളന്നു മരിച്ചു ആറിക്കിടക്കുന്നൊരമ്മയുടെ
മാറ് നുണയുന്ന കുഞ്ഞുങ്ങൾ പോലുമല്ല
* ഹിജ്‌റ : പലായനം

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം:
(ഫോട്ടോയും ഫോണ്‍ നമ്പറും സഹിതം)
[email protected], +919048906827

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.