സി വി ശ്രീരാമൻ ട്രസ്റ്റ് ഈ വർഷം നടത്താനിരുന്ന ആറാമത് സി വി ശ്രീരാമൻ സ്മൃതി പുരസ്കാര ചടങ്ങ് കേരളത്തിലുണ്ടായ പ്രളയത്തെ തുടർന്ന് മാറ്റിവെക്കാൻ തീരുമാനിച്ചിരിക്കുന്നു. അവാർഡിനുള്ള കൃതികൾ ക്ഷണിച്ചിരുന്നുവെങ്കിലും തിരഞ്ഞെടുപ്പ് നടക്കുന്നതിനിടയിലാണ് കേരളത്തെ മൊത്തം പ്രളയം ബാധിച്ചത്. ഈ ദുരന്തത്തെ നേരിടാൻ കേരള ജനത കാണിച്ച ജാഗ്രതയും അശ്രാന്ത പ്രയത്നവും ഏറെ മാതൃകാപരമാണ്. മുഖ്യമന്ത്രിയുടെ നേതൃത്വത്തിൽ നടക്കുന്ന ദുരിതാശ്വാസ പ്രവർത്തനങ്ങൾക്ക് കേരളത്തിലെ സാമൂഹ്യപ്രതിബദ്ധരായ ജനങ്ങൾക്കൊപ്പം ട്രസ്റ്റും പങ്കു ചേരുന്നു. ഈ വർഷം അവാർഡ് ദാന പരിപാടികൾ മാറ്റി വെച്ച് 25,000 രൂപ മുഖ്യമന്ത്രിയുടെ ദുരിതാശ്വാസ നിധിയിലേക്കു ആദരപൂർവ്വം നൽകും.
പതിവുപോലെ സി വി ശ്രീരാമന്റെ ചരമദിനമായ ഒക്ടോബർ പത്തിന് അദ്ദേഹത്തിന്റെ വസതിയിൽ ശ്രാദ്ധാഞ്ജലി ഉണ്ടായിരിക്കും. ഒക്ടോബർ 14 ഞായറാഴ്ച നാലുമണിക്ക് അനുസ്മരണ യോഗത്തിൽ ബാലചന്ദ്രൻ ചുള്ളിക്കാട് സി വി ശ്രീരാമൻ സ്മാരക പ്രഭാഷണം നടത്തുന്നതാണ്.