തിരുവനന്തപുരം: കറുത്ത വർണത്തിൽ തിളങ്ങുന്ന നീല കലർന്ന പച്ചയും ഏറ്റവുമുള്ളിൽ കടുംപച്ച നിറമുള്ള ചിറകുകളുമാണ് ബുദ്ധമയൂരിക്ക് സംസ്ഥാന ശലഭപട്ടം നേടികൊടുത്തത്. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന വൈൽഡ് ലൈഫ് ബോർഡ് യോഗത്തിലാണ് തീരുമാനം. ശുപാർശ സംസ്ഥാന സർക്കാർ അംഗീകരിക്കണമെന്ന ഔപചാരികതയാണ് ഇനി അവശേഷിക്കുന്നത്.
രാജ്യത്തെ ശലഭങ്ങളിൽ ഏറ്റവും ഭംഗിയേറിയവയാണ് ‘ബുദ്ധ പീകോക്ക്’ അഥവാ പാപ്പിലൊ ബുദ്ധയെന്ന ഇവ. ‘പാപിലിയോണിഡെ’ കുടുംബത്തിൽപ്പെട്ട ബുദ്ധമയൂരിയുടെ ചിറകിന് 90 മുതൽ 100 മില്ലിമീറ്റർ വരെ വീതിയുണ്ട്. മഹാരാഷ്ട്രയ്ക്ക് തെക്കുള്ള പശ്ചിമഘട്ടത്തിലാണ് ഇവ കൂടുതലായി കാണപ്പെടുന്നത്. കേരളം, കണർണാടക, ഗോവ സംസ്ഥാനങ്ങളിലും ഇവയുണ്ട്. കേരളത്തിൽ മലബാർ പ്രദേശത്ത് സുലഭമായി കാണാം. ജൂലായ് മുതൽ ഡിഡംബർ വരെയാണ് കൂടുതലായി കാണുക. ചിലപ്പോൾ ജനുവരിയിലും കാണാം.
മുള്ളുമുരുക്കിൽനിന്നാണ് ഇവ ആഹാരം ശേഖരിക്കുന്നത്. ബുദ്ധമയൂരിയും മുള്ളുമുരിക്കും വംശനാശഭീഷണി നേരിടുകയാണ്. ബുദ്ധമയൂരിയുടെ ഭംഗി തന്നെയാണ് അതിന്റെ ശാപവും. പേപ്പർ വെയ്റ്റുകൾക്ക് ഭംഗിപകരുന്നതിനും അലങ്കാരങ്ങൾക്കുമായാണ് ഇവയെ പിടികൂടുന്നത്.
മഹാരാഷ്ട്രയാണ് സംസ്ഥാന ശലഭത്തെ പ്രഖ്യാപിച്ച ആദ്യ സംസ്ഥാനം. വലുപ്പത്തിൽ രാജ്യത്തെ രണ്ടാമത്തെ ചിത്രശലഭമായ ബ്ലൂ മൊർമൊണാണ് മഹാരാഷ്ട്രയുടെ ശലഭം. രാജ്യത്തെ ഏറ്റവും വലിയ ചിത്രശലഭമായ ട്രിഡോസ് മിനോസിനെ കർണാടകം സംസ്ഥാന ശലഭമായി അംഗീകരിച്ചിട്ടുണ്ട്.
നാലിനം ചിത്രശലഭങ്ങളെയാണ് സംസ്ഥാന പദവിക്ക് പരിഗണിച്ചത്. വനദേവത (മലബാർ ട്രീ നിംഫ്), പുള്ളിവാലൻ (മലബാർ ബാൻഡഡ് സ്വാളൊടെയ്ൽ), മലബാർ റോസ് (പാച്ചിലോപ്ട പാണ്ടിയാന) എന്നിവയാണ് പട്ടികയിലുണ്ടായിരുന്ന മറ്റു മൂന്നെണ്ണം. വനദേവതയാണ് അവസാന റൗണ്ടിൽ ബുദ്ധമയൂരിയുമായി മത്സരിച്ചത്.