ഊർങ്ങാട്ടിരി : പച്ചയണിഞ്ഞ പ്രകൃതിയെ മുഴുവൻ ക്യാൻവാസിൽ നിറച്ച്, മഴയെ വരച്ച് കക്കാടം പൊയിലിന്റെ ശാന്ത സൗന്ദര്യത്തെ രണ്ടു ദിവസം വർണത്തിൽ ആറാടിച്ച അന്താരാഷ്ട്ര ചിത്രരചനാ ക്യാമ്പ് സമാപിച്ചു. ‘കല മാനവികതക്ക് , വർണം സ്നേഹത്തിന് ‘മുദ്രവാക്യവുമായി ഇന്ത്യൻ ചിത്രകലാ മേഖലയിലെ സജീവ സാന്നിധ്യമായ പിന്റോറസ്- ദി ആർട്ട് പീപ്പിൾ എന്ന ചിത്രകാരുടെ കൂട്ടായ്മയാണ് കക്കാടം പൊയിലിൽ മൺസൂൺ ക്യാമ്പ് നടത്തിയത്. ഇന്ത്യക്ക് പുറമെ നേപ്പാളി ചിത്രകാരന്മാരും ക്യാമ്പിൽ പങ്കെടുത്തു.
രാജ്യത്തിൻറെ വിവിധ ഭാഗങ്ങളിൽ ക്യാമ്പുകൾ നടത്തി വരയ്ക്കുന്ന ചിത്രങ്ങളുടെ വിൽപ്പന വഴി കിട്ടുന്ന പണം സാമൂഹിക പ്രവർത്തനത്തിനാണ് ഉപയോഗിക്കുന്നതെന്ന് ക്യാമ്പ് ഡയറക്ടർ ശ്രീകുമാർ മാവൂർ പറഞ്ഞു.
ആവിഷ്ക്കാർ ചന്ദ്രപ്രധാൻ, വിവേക് പെണ്ഡുൽ , ആശിഷ് അഗ്രഹാരി എന്നീ നേപ്പാളി ചിത്രകാരന്മാരും വിവിധ സംസ്ഥാനങ്ങളിൽ നിന്നുള്ള മുത്തുരാജ് ടി. ബേഗൂർ , അരുൺജിത് പഴശ്ശി , ഗിനീഷ് ഗോപിനാഥ് , ജഗദീഷ് പാലായാട്ട് , പ്രമോദ് കുമാർ മാണിക്കോത്ത് , കലേഷ് ദാസ് , രമേശ് രഞ്ജനം, കെ.ടി രജിത്, ടി.എം. സജീവൻ , ശ്രീജിത്ത് വിലാദപുരം, ബിനോയ്, ശ്രീകുമാർ മാവൂർ എന്നിവരും ക്യാമ്പിന് നേതൃത്വം നൽകി. സമാപന ചടങ്ങിൽ ഊർങ്ങാട്ടിരി ഗ്രാമപഞ്ചായത്ത് പ്രസിഡന്റ് എൻ.കെ. ഷൗക്കത്തലി , ക്യാമ്പ് ഡയറക്ടർ ശ്രീകുമാർ മാവൂർ, അബ്ബാസ് മാസ്റ്റർ, ഷമീർ കൈരളി , ജഗദീഷ് പാലയത്ത് എന്നിവർ സംസാരിച്ചു.
ചിത്രങ്ങൾ കാണാം
