കടം

വിഷ്ണു ലത

വസന്തം നരച്ചു തുടങ്ങുംമ്പോൾ
ഒരു യാത്രയിൽ മറവികളാൽ നാം കണ്ടുമുട്ടിയേക്കും

ബോഗിയിലേ തിരക്കിൽ അടുത്ത സ്റ്റോപ്പിറങ്ങേണ്ട യാത്രക്കാരന്റെ സീറ്റിൽ കണ്ണുനട്ടിരിക്കയാൽ
മഴയുടുപ്പ് തുന്നിയ തുലാ രാത്രികളൊന്നും ഒർമ്മയെ നനച്ച് കൊള്ളണമെന്നില്ല
മാസവസാനം കടം നിറഞ്ഞ കീശയിൽ മറന്നു വച്ച ഉമ്മകളുടെ കണക്കുണ്ടാവണമെന്നില്ല

വിന്റോ സീറ്റിൽ തല ചായിച്ച് പുറം കാഴ്ച്ചയിൽ ഒരു പ്രണയകാലത്തെയും മേയാൻ വിട്ടിലെന്നു വരാം
സ്റ്റോപിറങ്ങേണ്ടവന്റെ ആദിയും വീട്ടിലേക്കുള്ള ലാസ്റ്റ് ബസിന്റെ മുരൾച്ചയും അലട്ടുകയാവാം അപ്പോൾ
പ്രേമത്തിന്റെ ആഹ്ലാദ നിമിഷങ്ങളൊന്നും കണ്ണിൽ ബാക്കിയുണ്ടാവണമെന്നില്ല
മിച്ചം പിടിക്കാൻ പട്ടിണി കിടക്കുന്നവന്റെ ദയനീയതയാവാം
വിരൽ കോർത്ത വഴി നടത്തങ്ങളൊന്നും ഓർമ്മയെ വഴി നടത്തണമെന്നില്ല
വള്ളി പൊട്ടിയ ചെരുപ്പിൽ കുരുങ്ങി മുടന്തുകയാവാം

നോക്കൂ പ്രണയമേ
കീറിയ അഞ്ച് രൂപ നോട്ടിൽ
കൊളുത്തു പൊട്ടിയ കുളിമുറിയുടെ വാതിലിൽ
പകുതിയിലേറെ തീർന്ന ഉപ്പുപാത്രത്തിൽ
കണക്കെഴുതി തീയ്യതി കറുത്തു പോയ കലണ്ടറിൽ
കാലങ്ങളായി നിലച്ചുപോയ ക്ലോക്കിൽ
അത്രമേൽ നിശ്ചലമായ ഇടുങ്ങിയ മുറിയിൽ
അരവയർ പുകയുമ്പോൾ ഏതു കോണിലാണ് നിന്നെ ഓർത്തു നീറെണ്ടത്

ആത്മ ഓൺലൈനിലേക്ക് നിങ്ങൾക്കും കവിതകൾ അയക്കാം:
(ഫോട്ടോയും ഫോണ്‍ നമ്പറും സഹിതം)
8086451835 (WhatsApp)
nidhinvn@athmaonline.in