ചരിത്രം സൃഷ്ടിച്ച് ശതചിത്രക്ക് സമാപനം

കോഴിക്കോട്: ശതചിത്ര എന്ന പേരിൽ കോഴിക്കോട് ലളിതകലാ അക്കാദമി ആർട് ഗാലറിയിൽ നടന്ന 100 കലാകാരൻമാർ പങ്കെടുക്കുന്ന ചിത്ര ശിൽപ പ്രദർശനം സമാപിച്ചു. കേരളത്തിൽ ആദ്യമായാണ് 100 കലാകാരൻമാർ തങ്ങളുടെ സൃഷ്ടികളുമായി ഒരുമിക്കുന്നതും ഇത്ര വിപുലമായൊരു പ്രദർശനം സംഘടിപ്പിക്കപ്പെടുന്നതും. സംസ്ഥാനതലത്തിൽ കലാകാരന്മാരുടെ കൂട്ടായ്മ ശക്തിപ്പെടുത്താനും സമകാലിക രാഷ്ട്രീയ സാഹചര്യത്തിൽ ബഹുസ്വരതയുടെ വീണ്ടെടുപ്പ് കലയിലൂടെയും കലാകാരന്മാരിലൂടെയും സാധ്യമാക്കുന്നതിനുമാണ് ശതചിത്ര സംഘടിപ്പിച്ചത്. കേരളത്തിലെ പ്രഗത്ഭരായ കലാകാരൻമാർക്കൊപ്പം പുതിയ പ്രതിഭകളെ കൂടി പങ്കെടുപ്പിച്ചുകൊണ്ടായിരുന്നു പ്രദർശനം. പുതിയ രചനാ രീതികളും കലയിൽ നടക്കുന്ന സമകാലിക പരീക്ഷണങ്ങളും കലാകാരൻമാർക്കും കാഴ്ചക്കാർക്കും പരിചയപ്പെടുത്തുന്നതുകൂടിയായിരുന്നു ശതചിത്ര. വിവിധ ശൈലിയിലും മാധ്യമങ്ങളിലും സർഗാത്മക പ്രവർത്തനങ്ങൾ നടത്തുന്ന നൂറു കലാകാരൻമാരാണ് ശതചിത്രയിൽ പങ്കെടുത്തത്. വാട്ടർ കളർ, ഓയിൽ കളർ, അക്രിലിക്, മിക്‌സഡ് മീഡിയം, മ്യൂറൽ തുടങ്ങി വിവിധ മാധ്യമങ്ങളും രചനാരീതികളും ശിൽപങ്ങളും പ്രദർശനത്തിലുണ്ടായിരുന്നു. ഷമീം സീഗൾ, അനീസ് വടക്കൻ എന്നിവരാണ് ക്യൂറേറ്റർമാർ. പ്രദർശനം ആസ്പദമാക്കി ചലച്ചിത്ര പ്രവർത്തകനായ ബി എം റാസി ഡോക്യുമെന്ററി സംവിധാനം ചെയ്യുന്നുണ്ട്. ചിത്രകലയിൽ പുതിയ അധ്യായം സൃഷ്ടിച്ച ശതചിത്ര സമകാലിക ചിത്രകയുടെ പ്രതിഫലനം കൂടിയാണ്. നൂറു കലാസൃഷ്ടികൾ പങ്കുവെക്കുന്ന വിഷയ വൈവിധ്യവും രചനാശൈലിയിലെ വ്യതിരിക്തതയും പുതിയ കലാപരീക്ഷണങ്ങളും ക്യാമറയിൽ പകർത്തിക്കഴിഞ്ഞു. പ്രമുഖ കലാകാരന്മാരും കലാനിരൂപകരും ശതചിത്രയിലെ കലാവിഷ്‌കാരങ്ങളെക്കുറിച്ചും ചിത്രകലയിൽ ഈ പ്രദർശനം ഉണ്ടാക്കാനിടയുള്ള ഇടപെടലുകളെക്കുറിച്ചും സംസാരിക്കുന്നുണ്ട്. മലപ്പുറം കേന്ദ്രമായി പ്രവർത്തിക്കുന്ന ചിത്രകാരൻമാരുടെയും ചിത്രകലാ ആസ്വാദകരുടെയും കൂട്ടായ്മയായ വരക്കൂട്ടമാണ് പ്രദർശനം സംഘടിപ്പിച്ചത്. മൂന്ന് വർഷത്തോളമായി ചിത്രകലാ ക്യാമ്പുകളും ശിൽപശാലകളും കലാപ്രവർത്തനങ്ങളും നടത്തിവരുന്നു. കുറഞ്ഞ കാലം കൊണ്ട് സംസ്ഥാന തലത്തിൽ ശ്രദ്ധിക്കപ്പെടുന്നവിധമുള്ള കലാപ്രവർത്തനമാണ് വരക്കൂട്ടം നടത്തിക്കൊണ്ടിരിക്കുന്നത്. പ്രശസ്ത സംവിധായകനും ചിത്രകാരനുമായ ഐ വി ശശിയുടെ നിര്യാണത്തിൽ അനുശോചിച്ചുകൊണ്ടാണ് പ്രദർശനം സമാപിച്ചത്.