മേരി

രാധാകൃഷ്ണൻ എടച്ചേരി

എന്റെ കളിക്കൂട്ടുകാരി
പറങ്കിമാവിൽ കാക്കയും
നാട്ടുമാവിൽ അണ്ണാനുമായി

കശുവണ്ടി വറുത്ത് പരിപ്പും
മാമ്പഴം മുറിച്ച്
മധുരവും തന്നു
വള്ളിവെച്ചു വീഴ്ത്തിയവന്റെ
നെഞ്ചുടച്ചു

എന്നേക്കാൾ
വേഗത്തിൽ ഓടിയും
പുഴയിൽ നീന്തിയും
കുന്നു കേറിയും
കാടു തൊട്ടും
ഇരുളിൽ പതുങ്ങിയും
മൂക്കിൽ കൂടി പുകവിട്ടും
തോട് ചാടിയും കുതിച്ചു

ഡാം കണ്ട്
പിടുത്തം വിട്ടപ്പോൾ
ഒറ്റക്കയ്യിൽ തൂക്കിയെടുത്തു

അവൾ ജയനും
ഞാൻ സീമയുമായി

നനുത്ത
മീശ താടി
ശബ്ദം എന്റേത് !

സംശയം ഇഴഞ്ഞു

ഒരിക്കൽ
കണ്ടുപിടിച്ചു

എന്റേതല്ല
മേരിക്ക്!!

ആത്മ ഓൺലൈനിലേക്ക് നിങ്ങൾക്കും കവിതകൾ അയക്കാം:
(ഫോട്ടോയും ഫോണ്‍ നമ്പറും സഹിതം)
8086451835 (WhatsApp)
nidhinvn@athmaonline.in