നിധിൻ.വി.എൻ
ശാരീരിക ബുദ്ധിമുട്ടുകൾക്കിടയിലും കേരള സർവ്വകലാശാല കലോത്സവ വേദിയെ ആവേശം കൊളളിച്ച് കൈതപ്രം ദാമോദരൻ നമ്പൂതിരി. സ്വാഗത സംഘം ചെയർമാൻ കെ.എൻ ബാലഗോപാലിന്റെ കൈപിടിച്ചു മിമിക്രി മത്സരത്തിന്റെ ഇടവേളയിലാണ് അദ്ദേഹം കലോത്സവത്തിനെത്തിയത്. പ്രിയ കവിയെ, ഗാനരചയിതാവിനെ കണ്ടതിന്റെ ഹർഷാരവത്തിന് അഭിവാദ്യം നൽകി അദേഹം വേദിയിലെത്തി.
അവശത കാണിക്കാനല്ല ഊർജ്ജസ്വലത കാണിക്കാനാണ് ആശുപത്രിക്കിടക്കയിൽ നിന്ന് കലോത്സവ നഗരിയിലെത്തിയതെന്നും, അസ്തമയത്തെ നോക്കി സങ്കടപ്പെടുകയല്ല വേണ്ടത് അതിനപ്പുറമുള്ള ഉദയത്തെ അന്വേഷിക്കുകയാണ് വേണ്ടതെന്നും അദ്ദേഹം പറഞ്ഞു. വേദിക്കും സദസിനും ഊർജ്ജം പകരുന്നതായിരുന്നു കൈതപ്രത്തിന്റെ വാക്കുകൾ. ഞാൻ രക്ഷപ്പെടുകയില്ലെന്ന് വെല്ലൂരിൽ കിടക്കുമ്പോൾ ഡോക്ടറായ മകൻ പോലും പറഞ്ഞിരുന്നു, അവിടെ നിന്നാണ് ഞാൻ ഇവിടെ എത്തിയതെന്ന് അദ്ദേഹം കൂട്ടി ചേർത്തു. വരവേൽപ്പിലെ ദൂരെ ദൂരെ സാഗരം തേടി എന്ന ഗാനം കലോത്സവ വേദിക്കായി സമർപ്പിച്ചു കൊണ്ടാണ് അദ്ദേഹം വേദി വിട്ടത്.