ആലപ്പുഴയിൽ നടക്കുന്ന 59മത് സംസ്ഥാന സ്‌കൂൾ കലോത്സവം ഹൈടെക് ആക്കുന്നതിന് കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) സംവിധാനം ഒരുക്കി.
രജിസ്‌ട്രേഷൻ, ഫലപ്രഖ്യാപനം, സർട്ടിഫിക്കറ്റ് പ്രിന്റിംഗ് എന്നിവ പൂർണ്ണമായും ഓൺലൈനാക്കി. മത്സരാർത്ഥികളെ ക്ലസ്റ്ററുകളാക്കി തിരിക്കുക, അവരുടെ പാർട്ടിസിപ്പന്റ് കാർഡ് ലഭ്യമാക്കുക, ടീം മാനേജർമാർക്കുളള റിപ്പോർട്ടുകൾ, സ്‌റ്റേജുകളിലെ വിവിധ ഇനങ്ങൾ, ഓരോ സ്‌റ്റേജിലേയും മത്സരങ്ങൾ യഥാസമയം നടത്തുന്നതിനുള്ള ടൈംഷീറ്റ്, കാൾഷീറ്റ്, സ്‌കോർഷീറ്റ്, ടാബുലേഷൻ തുടങ്ങിയവ തയ്യാറാക്കുന്നത് പോർട്ടൽ വഴിയാണ്. ഹയർ അപ്പീൽ നടപടിക്രമങ്ങളും ഇത്തവണ പോർട്ടൽവഴിയായതിനാൽ പെട്ടെന്ന് ഫലപ്രഖ്യാപനം നടത്താനാവും. വെബ് പോർട്ടൽ വഴി മത്സര ഫലങ്ങൾ പൊതുജനങ്ങൾക്കുൾപ്പെടെ തത്സമയം അറിയാം.
പോർട്ടലിലെ വിവരങ്ങൾ വേഗം ലഭിക്കുന്നതിന് ‘പൂമരം’ മൊബൈൽ ആപ്പും കൈറ്റ് ഒരുക്കിയിട്ടുണ്ട്. മത്സരഫലങ്ങൾ ആപ്പിൽ ലഭിക്കും. ഗൂഗിൾ പ്ലേ സ്‌റ്റോറിൽ നിന്ന് ‘KITE poomaram’ എന്ന് നൽകി ആപ്പ് ഡൗൺലോഡ് ചെയ്യാം. കലോത്സവം ലൈവിനു പുറമെ വിക്ടേഴ്‌സ് ചാനലിലൂടെയും പൂമരത്തിലൂടെയും തത്സമയം കാണാം.