“മാനിഷാദ” – 2017 ഒക്ടോബർ അഞ്ച് മുതൽ  പത്ത് വരെ കോഴിക്കോട് ലളിതകലാ ആർട്ട് ഗാലറിയിൽ വെച്ച് നടക്കുന്ന ഫോട്ടോപ്രദർശനത്തിന്  അജീബ് കോമാച്ചി നൽകിയ പേര് അതാണ്. പ്രശസ്ത പ്രസ് ഫോട്ടോഗ്രാഫറായ അജീബ് കോമാച്ചി വ്യത്യസ്തമായ തൻറെ ഫോട്ടോകൾക്കൊപ്പം പ്രദർശനങ്ങൾക്ക് തെരഞ്ഞെടുക്കുന്ന പേരുകൾ കൊണ്ട് മുന്പും നമ്മെ വിസ്മയിപ്പിച്ചിട്ടുണ്ട്. ഓരോപ്രദർശനത്തിലും ഉൾപ്പെടുത്തിയിരിക്കുന്ന ചിത്രങ്ങൾ ഏതു ഗണത്തിൽപ്പെടുന്നവയെന്ന് ഉറക്കെ വിളിച്ചു പറയുന്നവയായിരുന്നു ഓരോ പ്രദർശനത്തിനും തെരഞ്ഞെടുക്കുന്ന പേരുകൾ.. ദുരന്തഭൂമിയിലൂടെ, നഷ്ടബാല്യം, പെൺനോവ്, അറബി-മലയാളം, ചിത്രം ചരിത്രം, ഗോഡ്സ് ഓൺ കണ്‍ട്രി, കാക്കത്തൊള്ളായിരത്തി ഒന്ന്, ഒലീവ് ഇലയിലെ ഇളംചോര, ഹിന്ദുസ്ഥാനി എന്നീ പ്രദർശനങ്ങൾക്കു ശേഷമാണ്  കാടിനും കാട്ടുജീവികൾക്കും മനുഷ്യൻ ഉയർത്തുന്ന വെല്ലുവിളികളെ ഓർമപ്പെടുത്തിക്കൊണ്ട്    “മാനിഷാദ” സംഘടിപ്പിച്ചിരിക്കുന്നത്. പ്രദർശനം ഒക്ടോബർ 5 ന് വൈകിട്ട് ഡി.എഫ്.ഒ കെ.കെ സുനിൽ കുമാറിൻറെയും പ്രശസ്തഫോട്ടോഗ്രാഫർ പി. മുസ്തഫയുടെയും സാന്നിദ്ധ്യത്തിൽ മുൻവനംവകുപ്പ് മന്ത്രി ശ്രീ. ബിനോയ് വിശ്വം നിർവഹിക്കും.